صدقوني ايلا قلت ليكم بللي حاولت بكاع الطرق انني نحمي نفسي بحيث كنت تانخرج غير للضرورة (تسوق/عمل) , ولكن للاسف الفيروس كاين و احيانا شحال ما حاولتي تحمي راسك غادي تصاب وهكذا كان الحال بالنسبة ليا.

ومن الصعب انني نتذكر و لا نعرف كيفاش تصابيت .

الخبر الزوين هو انني اليوم قدرت نتغلب على هاد المرض بفضل دعمكم وبفضل ارشادات الاطر الصحية فدولة قطر و الفيروس ما اترش فيا بزاف.

الاعراض كانت خفيفة وكان عندي ايمان قوي بانه غنتغلب على الوباء و حاولت نحافظ على الروح الايجابية للي كان ليها تا هي دور كبير فالشفاء و بالاضافة لدعواتكم و دعمكم اللا مشروط هاني اليوم سعيد انني كانشارك معكم خبر تخلصي من الفيروس بصفة نهائية .

كانشكر اصدقاءي فدولة قطر للي قدمو يد المساعدة و للي وقفو معايا وقتما احتاجيت شي حاجة.

و كانشكر كاع الاصدقاء على الدعم المعنوي للي قدمو ليا سواء كنتو على دراية او لا، فتواجدكم فقط وسلامتكم بعثو فيا بزاف تالايجابية باش ان هاد الفترة تدوز بردا و سلام.

كانعتذر ايلا ماقدرتش نشارك الخبر من البداية مع كلشي حيت كنت مركز بزاف على الوضع الصحي و عارف بللي كل و همو فهاد الوقيتة الله يحسن العوان ولكن انا متأكد ان كل صديق كانت فراسو كان غايقدم لي بزاف تالدعم واعتز بتواجدكم فحياتي.

طيلة هاد 26 يوم للي دوزت خلاتني نتعلم بزاف تالحوايج خاصة اهمية الصحة و الوقت.

و حياتنا للي كنا تانتشكاو منها ماكانتش بذاك الملل للي كنا تانحسو بيه وكاتزيد تلاحظ الفرق فاش كاتكون محبوس بين ربعة تالحيوط ماقادرش تشوف الناس تحس بأشعة الشمس و شوية تالهواء تبرا.

هاد الفيروس كاين و الاعراض تختلف من شخص لآخر و تقدر تكون صعيبة بالنسبة للبعض، خاصة فاش تم تحويلي للمستشفى ( فقط للاطلاع على وضعي الصحي و اخذ عينات من الدم ) شفت ناس فمختلف الاعمار بأعراض اقوى من للي كانت عندي بعض من هاد الناس كانو قدي او صغر مني و هذا دليل بللي هاد الوباء ماتايحيرش شحال ما كان فعمرك.

انا حاليا فوضع احسن و بعد التعافي عزلت نفسي لمدة معينة حسب ارشادات الحكومة وهاد المنشور درتو باش نطمأنكم.

ارجوكم ماتستصغروش هاد المرض و لا قدر الله حسيتو بشي اعراض وخا تكون خفيفة سيرو ديرو التيست حيت بالنسبة ليا انا الوباء بداني بسخانة خفيفة للي كنت تانعتابرها عادية جدا.

فاش يسالي هادشي حاولو ماتشكاوش من الحياة اليومية العادية حيت عارفكم بللي كاملكم توحشتوها دابا و حاولو تديرو داكشي للي كنتو باغين تديرو اليوم قبل من غذا و حاولو تنشرو بزاف تالحب و الايجابية.